ఆంధ్రప్రదేశ్ ఇంటర్ బోర్డు విద్యా విధానంలో కీలక సంస్కరణలను తీసుకువస్తోంది. దీని కింద పరీక్షా విధానం, పాస్ మార్కులలో మార్పులు చోటు చేసుకుంటున్నాయి. తాజా ప్రతిపాదనలను విద్యామండలి రాష్ట్రంలోని అన్ని కాలేజీలకు వివరిస్తూ, రాబోయే పబ్లిక్ పరీక్షల నుండి కొత్త విధానాన్ని అమలు చేయనుందని తెలిపింది. ఈ మార్పులతో ప్రధాన సబ్జెక్టుల పాస్ మార్కులు కూడా కొత్త నిర్ణయాల ప్రకారం అమలు కాబోతున్నాయి.
ఇంటర్ విద్యలో ముఖ్యమైన మార్పులలో గణితంలో మార్పు ప్రత్యేకంగా ఉంది. ఈ ఏడాది నుండి గణితం ఒక్క సబ్జెక్టు మాత్రమే పరీక్షలలో ఉండబోతుంది. ఇప్పటివరకు 1ఏ, 1బీ పేరుతో రెండు విభాగాలుగా ఉన్న గణితాన్ని ఒక్కటిగా మార్చారు. గతంలో ప్రతి పేపర్ 75 మార్కులుగా ఉండేది, పాస్ మార్కులు 26. కొత్త విధానం ప్రకారం, ఇంటర్ రెండేళ్లలో గణితం ఒక్క పేపర్గా 100 మార్కులుగా పరీక్షలు నిర్వహించబడతాయి. 35 మార్కులు సాధించినవారు ఉత్తీర్ణులుగా పరిగణించబడతారు.
బైపీసీ గ్రూప్లో బోటనీ, జూవాలజీ సబ్జెక్టులను కలిపి బయాలజీగా మార్చారు. ఈ పరీక్ష 85 మార్కులుగా ఉంటుంది. ఫస్టియర్లో 29 మార్కులు, సెకండియర్లో 30 మార్కులు పొందిన విద్యార్థులు ఉత్తీర్ణులుగా ఉంటారు. ఫిజిక్స్, కెమిస్ట్రీ సబ్జెక్టులలో కూడా ఇదే పాస్ మార్కులు వర్తిస్తాయి.
గతంలో, ప్రతి సబ్జెక్టుకు 60 మార్కుల పరీక్ష ఉంటుండగా, పాస్ మార్కులు 21. అయితే, ప్రస్తుతం రెండో సంవత్సరం చదువుతున్న విద్యార్థులు లేదా పూర్వ సంవత్సరం ఫెయిల్ అయినవారికి ఈ కొత్త మార్పులు వర్తించవు.
అదనంగా, ఈ ఏడాది నుండి ఎలక్టివ్ సబ్జెక్టు విధానం ప్రారంభమైంది. ఏ గ్రూప్ విద్యార్థి అయినా మొత్తం 24 సబ్జెక్టుల్లో ఏదైనా ఒకటి ఎంచుకొని చదవవచ్చు. విద్యార్థి ఎంచుకునే సబ్జెక్టు ఆధారంగా ఫస్ట్ ఇయర్ మార్కులు మారతాయి: సైన్స్ సబ్జెక్టులు 85 మార్కులు, ఆర్ట్స్ సబ్జెక్టులు 100 మార్కులు. మొత్తం రెండేళ్లలో పరీక్షలు 1000 మార్కులకు నిర్వహించబడతాయి. ఫిజిక్స్, కెమిస్ట్రీ, బయాలజీ విద్యార్థులకు ప్రాక్టికల్స్ 30 మార్కులుగా ఉంటాయి.
ఎలక్టివ్ సబ్జెక్ట్ విధానం అమలుకాబోయటంతో, పరీక్షల షెడ్యూల్ పెరిగింది. విద్యామండలి అధికారులు అన్ని కాలేజీలకు కొత్త విధానం గురించి తెలియజేసి, విద్యార్థులను సిద్ధం చేయాలని సూచించారు. ఇంటర్ పరీక్షల షెడ్యూల్ ఇప్పటికే ఖరారు చేయబడింది, కాబట్టి విద్యార్థులు తాజా మార్పుల ప్రకారం పరీక్షలకు సిద్ధం కావాలి.
