ప్రతి ఏడాది డీఎస్సీ తప్పనిసరి – ఉపాధ్యాయ నియామకాలకు నారా లోకేశ్ కీలక దిశానిర్దేశం

ఆంధ్రప్రదేశ్‌లో ఉపాధ్యాయ ఉద్యోగాల కోసం ఏళ్లుగా ఎదురుచూస్తున్న లక్షలాది నిరుద్యోగులకు రాష్ట్ర ప్రభుత్వం శుభవార్తను అందించింది. ఎన్నికల్లో ఇచ్చిన హామీ మేరకు ప్రతి ఏడాది డీఎస్సీ నిర్వహించేందుకు ప్రభుత్వం నిర్ణయించిందని రాష్ట్ర ఐటీ మరియు విద్యాశాఖ మంత్రి నారా లోకేశ్ ప్రకటించారు.

గురువారం సచివాలయంలో విద్యాశాఖ, పాఠశాల, ఇంటర్మీడియట్, కళాశాల విద్యా విభాగాల ఉన్నతాధికారులతో జరిగిన సమీక్షా సమావేశంలో మంత్రి ముఖ్య నిర్ణయాలు వెల్లడించారు. ఈ సందర్భంగా ఆయన మాట్లాడుతూ, ఈ ఏడాది నవంబర్ చివరి వారంలో ఉపాధ్యాయ అర్హత పరీక్ష (TET) నిర్వహించాలని, 2026 జనవరిలో DSC మరియు స్పెషల్ DSC నోటిఫికేషన్లు విడుదల చేయాలని అధికారులను ఆదేశించారు. మార్చిలో పరీక్షలు పూర్తి చేసి, వచ్చే విద్యా సంవత్సరం ప్రారంభానికి ముందే కొత్త ఉపాధ్యాయులను విధుల్లోకి తీసుకునేలా ప్రణాళిక సిద్ధం చేయాలని సూచించారు.

ఉపాధ్యాయులకు ప్రభుత్వం భరోసా

ఉపాధ్యాయుల సమస్యల పరిష్కారానికి ప్రభుత్వం కట్టుబడి ఉందని లోకేశ్ తెలిపారు. ఇప్పటి వరకు తమ దృష్టికి వచ్చిన 423 వినతులలో 200 కేసులు పరిష్కరించబడ్డాయని, మిగతావి విధానపరమైన మరియు ఆర్థికపరమైన అంశాలతో ముడిపడి ఉన్నాయని వివరించారు. ఉపాధ్యాయులు, అభ్యర్థులు టెట్, డీఎస్సీకి ఇప్పటి నుంచే సన్నద్ధమవ్వాలని పిలుపునిచ్చారు.

విద్యా ప్రమాణాలను అంతర్జాతీయ స్థాయికి

రాష్ట్రంలో విద్యా ప్రమాణాలను అంతర్జాతీయ స్థాయికి తీసుకెళ్లడం ప్రభుత్వ ప్రధాన లక్ష్యమని మంత్రి పేర్కొన్నారు. విద్యార్థుల్లో కనీస అభ్యసన సామర్థ్యాలు పెంపొందించేందుకు పటిష్టమైన కార్యాచరణ ప్రణాళిక రూపొందించాలని ఆదేశించారు. ఇందుకోసం బేస్‌లైన్ టెస్టుల నిర్వహణకు మార్గదర్శకాలు సిద్ధం చేయాలన్నారు.

పదో తరగతి విద్యార్థులకు డిసెంబర్ నాటికే సిలబస్ పూర్తిచేసి, ఆ తర్వాత 100 రోజుల ప్రత్యేక శిక్షణా కార్యక్రమం ద్వారా మెరుగైన ఫలితాలు సాధించాలని విద్యాశాఖకు దిశానిర్దేశం చేశారు.

ఉపాధ్యాయుల కోసం సింగపూర్ పర్యటన

విద్యా వ్యవస్థలో వినూత్న పద్ధతులను అధ్యయనం చేయడానికై రాష్ట్రంలోని 78 మంది ఉత్తమ ఉపాధ్యాయులను సింగపూర్ పర్యటనకు పంపాలని మంత్రి నిర్ణయించారు. దీనికి సంబంధించిన ఏర్పాట్లు వెంటనే చేయాలని అధికారులను ఆదేశించారు.

కొత్త నవోదయ పాఠశాలలు – వేగవంతమైన పనులు

రాష్ట్రానికి తాజాగా మంజూరైన 11 జవహర్ నవోదయ విద్యాలయాల నిర్మాణ పనులను వేగవంతం చేయాలని మంత్రి లోకేశ్ ఆదేశించారు. వీటిని త్వరితగతిన ప్రారంభించేందుకు అవసరమైన నిధుల కేటాయింపులపై దృష్టి పెట్టాలని సూచించారు.

సెంట్రల్ లైబ్రరీ కోసం హ్యాకథాన్

అమరావతిలో రూ.100 కోట్ల వ్యయంతో నిర్మించబోయే సెంట్రల్ లైబ్రరీ డిజైన్ ఎంపిక కోసం ‘హ్యాకథాన్’ నిర్వహించాలని మంత్రి సూచించారు. జిల్లా, నియోజకవర్గ కేంద్రాల లైబ్రరీలను ఆధునిక సదుపాయాలతో మార్చాలని ఆదేశించారు. అలాగే, స్థానిక సంస్థల నుంచి రావాల్సిన లైబ్రరీ సెస్సు వసూలు ప్రక్రియను వేగవంతం చేయాలని తెలిపారు.

మధ్యాహ్న భోజన పథకం – ‘స్మార్ట్ కిచెన్’ నమూనా

కడప జిల్లాలో విజయవంతంగా అమలు చేసిన ‘స్మార్ట్ కిచెన్’ పథకంను రాష్ట్రంలోని అన్ని జిల్లాలకు విస్తరించాలని మంత్రి సూచించారు. దీని ద్వారా మధ్యాహ్న భోజన నాణ్యతను పెంచి విద్యార్థుల ఆరోగ్యాన్ని మెరుగుపరచాలన్నారు.

హైస్కూళ్లలో కంప్యూటర్ ల్యాబ్‌లు, ఇతర మౌలిక వసతులు కల్పించేందుకు చర్యలు తీసుకోవాలని స్పష్టం చేశారు.

ఈ సమావేశంలో విద్యాశాఖ ప్రధాన కార్యదర్శి కోన శశిధర్, పాఠశాల విద్యా కమిషనర్ విజయరామరాజు, కళాశాల విద్యా డైరెక్టర్ నారాయణ భరత్ గుప్తా, మరియు ఇతర ఉన్నతాధికారులు పాల్గొన్నారు.