కారులోనే జీవితం… మలేషియాలో పేదరికం కదిలించిన విషాద గాధ
పేదరికం ఒక మనిషిని ఎప్పుడెప్పుడు ఎలాంటి పరిస్థితుల్లోకి నెడుతుందో చెప్పడం కష్టం. దాని బారిన పడిన వారు జీవనోపాధి కోసం ఏదైనా చేయాల్సిన పరిస్థితి ఎదుర్కొంటారు. మలేషియా రాజధాని కౌలాలంపూర్లో అటువంటి హృదయ విదారక ఘటన వెలుగులోకి వచ్చింది.
బందర్ బారు సెంతుల్ ప్రాంతంలోని ఒక మసీదు ప్రాంగణంలో రెండేళ్లుగా నిలిచి ఉన్న పాత కారులో ఒక కుటుంబం నివసిస్తోందన్న విషయం ఇటీవల బయటపడింది. బయటకు చూస్తే ఆ కారు వాడుకలో లేకుండా ఉన్న ఒక పాత వాహనం అనిపించింది. కానీ లోపలికి చూసినప్పుడు అందరినీ షాక్కు గురి చేసింది. ఎందుకంటే ఆ వాహనంలో ఒక దంపతులు, వారి ఇద్దరు చిన్నారులు జీవనం సాగిస్తున్నారు.
ఈ కుటుంబం కౌలాలంపూర్లో మెరుగైన జీవితం కోసం పహాంగ్ ప్రావిన్స్లోని టెమెర్లో నుంచి వచ్చింది. కానీ జీవనోపాధి దొరకక, అద్దె భారం తాళలేక చివరికి వీధుల్లోకి చేరింది. దారిన మసీదు ప్రాంగణంలో ఉన్న తమ పాత కారును నివాసంగా మార్చుకున్నారు. ఇరుకైన కారులో నలుగురు జీవించడం కష్టం అయినా కూడా ఆ కుటుంబం ఆత్మగౌరవం కోల్పోకుండా జీవిస్తోంది.
ఫెడరల్ టెరిటరీ ఉమ్నో ఇన్ఫర్మేషన్ చీఫ్ దాతుక్ సులామ్ ముజఫర్ గులుమ్ ముస్తాకిమ్ ఈ కుటుంబం గురించి తెలుసుకుని తీవ్రంగా చలించిపోయారు. ఆయన తన ఫేస్బుక్ పేజీలో ఈ సంఘటనను పంచుకుంటూ ఇలా రాశారు —
“ఈ కుటుంబం మొత్తం ఒక పాత కారుపైనే ఆధారపడి ఉంది. ఇద్దరు పిల్లలు స్కూల్కు వెళ్తున్నారు. కానీ వీరికి ఇల్లు లేదు. ఆ కారు ఎప్పుడూ కదలదు కానీ దాని లోపల ఒక చిన్న కుటుంబం జీవితం సాగుతోంది.”
మసీదు ఆవరణలో పార్కింగ్ సౌకర్యం కొంత రక్షణగా మారింది. కానీ వర్షాకాలంలో పరిస్థితి మరింత దుర్భరంగా మారిందని ఆయన వివరించారు.
ఈ పోస్టు సోషల్ మీడియాలో విపరీతమైన స్పందనను తెచ్చుకుంది. ప్రజలు విరాళాల రూపంలో సహాయం చేయడం ప్రారంభించారు. వెంటనే ఉమ్నో బటు విభాగం స్పందించింది. వారు ఫెడరల్ టెరిటరీ ఇస్లామిక్ రిలిజియస్ కౌన్సిల్ (MAIWAP) మరియు కౌలాలంపూర్ సిటీ హాల్ (DBKL) అధికారులను సంప్రదించి, ఆ కుటుంబానికి తాత్కాలికంగా ట్రాన్సిట్ హౌస్ అందించేలా చర్యలు చేపట్టారు.
దాతుక్ సులామ్ మాట్లాడుతూ,
“పిల్లలు చదువు కొనసాగించేందుకు, కుటుంబం స్థిరపడేందుకు తామే తగిన అద్దె ఇల్లు ఏర్పాటు చేసేందుకు ప్రయత్నిస్తున్నాం,”
అన్నారు.
మసీదు కమిటీ కూడా ఈ కుటుంబానికి మద్దతుగా నిలిచింది. అప్పుడప్పుడు ఆహారం, నీరు అందిస్తోంది. కానీ ఇది తాత్కాలిక సహాయం మాత్రమేనని, శాశ్వత పరిష్కారం కావాలని కమిటీ సభ్యులు కోరుతున్నారు.
ఈ ఘటన మలేషియాలో పేదరికంపై పెద్ద చర్చకు దారితీసింది. చాలా మంది నెటిజన్లు ప్రభుత్వం బాధ్యత తీసుకోవాలని, ఇలాంటి పరిస్థితులు మరోసారి రాకుండా చర్యలు చేపట్టాలని సూచిస్తున్నారు.
ఒక పాత కారులోనే జీవనం సాగిస్తున్న ఈ కుటుంబం కథ ప్రస్తుతం ప్రపంచమంతా చర్చనీయాంశంగా మారింది — “సంపన్న దేశంలో పేదరికం ఇంత దారుణంగా ఎందుకు?” అనే ప్రశ్నను మలేషియా సమాజం ఎదుట ఉంచింది.
