Mythological Anime Movies: ఇండియన్ సినిమా పరిశ్రమలో ఇప్పుడు మైథాలజీ, యానిమేషన్ కలయిక ఒక కొత్త తరంగం లా మారింది. ఇటీవల విడుదలైన మహావతార్ నరసింహ సినిమా ఈ ట్రెండ్ కు నాంది పలికింది. చిన్న పిల్లలు మాత్రమే కాదు, అన్ని వయసుల ప్రేక్షకులను ఆకట్టుకొని థియేటర్లలోనే కాకుండా ఓటీటీ లోనూ సంచలనాన్ని సృష్టించింది. ఈ విజయం వెనుక బలమైన స్ఫూర్తితో వాయుపుత్ర, కురుక్షేత్ర వంటి మరిన్ని పౌరాణిక యానిమేషన్ సినిమాలు, వెబ్ సిరీస్లు వస్తున్నాయి. ఈ కొత్త ప్రయోగం భారతీయ సినీ పరిశ్రమకు సరికొత్త దారిని చూపుతోందని చెప్పాలి. ఇక రాబోయే ప్రాజెక్టులు ఏవో చూద్దాం.
ఒక సినిమా హిట్టైతే ట్రెండ్ కొనసాగింపు
భారతీయ సినీ పరిశ్రమలో ఒక సినిమా బాక్సాఫీస్ వద్ద భారీ హిట్టయితే, దాని ప్రభావం కొన్నేళ్లపాటు కనిపిస్తుంది. అదే తరహా సినిమాలను మరింత మంది దర్శకులు చేయడానికి ఆసక్తి చూపుతారు. గత కొన్నేళ్లుగా మైథలాజికల్ ట్రెండ్ బలంగా కొనసాగుతోంది. పురాణాల్లోని గాథలను, దేవతల కథలను, ఇతిహాసాలను పెద్ద ఎత్తున తెర మీదకు తీసుకువస్తున్నారు. భాషా భేదం లేకుండా ప్రేక్షకులు అలాంటి సినిమాలను పెద్ద ఎత్తున ఆదరిస్తున్నారు. ఇప్పుడు ఆ మైథాలజీకి యానిమేషన్ కలయిక జోడైంది. పౌరాణిక గాథలను ఆధునిక యానిమేషన్ టెక్నాలజీతో చూపించే ట్రెండ్ మొదలైంది.
యానిమేషన్ చిత్రాలపై నూతన దృష్టి
సాధారణంగా యానిమేషన్ సినిమాలు అంటే పిల్లల కోసం మాత్రమే అనే భావన ఎక్కువగా ఉంది. కార్టూన్ లాంటి పాత్రలు, వినోదాత్మక అంశాలు ఉండటం వల్ల చిన్నారులు ఎక్కువగా కనెక్ట్ అయ్యేవారు. అందువల్ల యానిమేషన్ సినిమాలు ఒక పరిమిత వర్గం ప్రేక్షకుల వరకే పరిమితమయ్యాయి. కానీ తాజాగా వచ్చిన మహావతార్ నరసింహ ఆ అవరోధాలను చెరిపేసింది. ఈ చిత్రం యానిమేషన్ సినిమాలు కేవలం పిల్లలకు మాత్రమే కాకుండా, కుటుంబాలతో సహా అన్ని వర్గాల ప్రేక్షకులను అలరించగలవని నిరూపించింది. బాక్సాఫీస్ వద్ద వసూళ్ల వర్షం కురిపించి చరిత్ర సృష్టించింది.
మహావతార్ నరసింహ – అద్భుత గర్జన
మహావతార్ నరసింహ చిత్రం విష్ణు పురాణం, నరసింహ పురాణం, శ్రీమద్భాగవత పురాణం ఆధారంగా తెరకెక్కింది. మహావతార్ సినిమాటిక్ యూనివర్స్ (MCU) లోని తొలి చిత్రం ఇది. జయపూర్ణదాస్ కథను ఆధారంగా తీసుకుని దర్శకుడు అశ్విన్ కుమార్ దాదాపు ఐదేళ్లపాటు శ్రమించి తెరపైకి తెచ్చారు. హోంబలే ఫిల్మ్స్ నిర్మించిన ఈ సినిమాను తెలుగు లో గీతా ఆర్ట్స్ డిస్ట్రిబ్యూషన్ లో అల్లు అరవింద్ విడుదల చేశారు.
రూ. 40 కోట్ల బడ్జెట్ తో నిర్మించిన ఈ సినిమా, ప్రపంచవ్యాప్తంగా రూ. 320 కోట్ల వసూళ్లు సాధించింది. ఓటీటీ యుగంలోనూ 50 రోజులకు పైగా థియేటర్లలో విజయవంతంగా ప్రదర్శించబడింది. ఒక్క హిందీ వెర్షన్ ద్వారానే రూ. 180 కోట్లకు పైగా వసూళ్లు రాబట్టింది. దీంతో ఇది ఇప్పటివరకు అత్యధిక వసూళ్లు సాధించిన భారతీయ యానిమేషన్ చిత్రంగా నిలిచింది. నెట్ఫ్లిక్స్ లోనూ పలు వారాలు టాప్ ట్రెండింగ్ మూవీస్ లిస్ట్ లో కొనసాగింది.
వెనుక ఉన్న కష్టసాధ్య ప్రయత్నం
ఈ సినిమా వెనుక దర్శకుడు అశ్విన్ కుమార్, ఆయన భార్య శిల్పా ధవన్ ఎన్నో త్యాగాలు చేశారు. తమ ఆస్తులన్నీ అమ్ముకుని అప్పులు చేసి ఈ ప్రాజెక్ట్ పూర్తి చేశారు. యానిమేషన్ లో దేవతల కథలు తీస్తే నష్టమే అన్న అపోహను చెరిపివేశారు. 3డీ యానిమేషన్ లో ప్రతి సన్నివేశం రూపొందించడం ఎంత కష్టమో వారు చూపించారు. ఒక్క ఐదు నిమిషాల సీన్ కోసం నెలల తరబడి కష్టపడాల్సి వచ్చిందని చెబుతున్నారు.
వాయుపుత్ర – హనుమంతుని గాథ
మహావతార్ నరసింహ విజయం యానిమేషన్ సినిమాలకు ఒక పెద్ద బూస్ట్ ఇచ్చింది. ఇప్పుడు టాలీవుడ్ లో సితార ఎంటర్టైన్మెంట్స్ సంస్థ భారీ స్థాయిలో వాయుపుత్ర అనే 3డీ యానిమేషన్ సినిమాను ప్రకటించింది. చందూ మొండేటి దర్శకత్వం వహించనున్న ఈ సినిమా హనుమంతుని అద్భుత గాథ ఆధారంగా తెరకెక్కుతుంది. పాన్ ఇండియా స్థాయిలో విడుదల చేయాలని నిర్ణయించారు.
ప్రొడ్యూసర్లు వాయుపుత్ర అనేది సినిమా మాత్రమే కాకుండా, థియేటర్లను దేవాలయాలుగా మార్చే పవిత్ర అనుభూతి అవుతుందని పేర్కొన్నారు. 2026 దసరా సందర్భంగా ఈ చిత్రం విడుదల చేయనున్నారు.
మహావతార్ సినిమాటిక్ యూనివర్స్ విస్తరణ
హోంబలే ఫిల్మ్స్ ఇప్పటికే మరో ఏడు సినిమాలను ప్రకటించింది. ప్రతి రెండేళ్లకో సినిమా విడుదల చేస్తామని తెలిపింది. వాటిలో మహావతార్ పరశురామ్ (2027), మహావతార్ రఘునందన్ (2029), మహావతార్ ద్వారకాధీష్ (2031), మహావతార్ గోకులానంద (2033), మహావతార్ కల్కి పార్ట్ 1 (2035), మహావతార్ కల్కి పార్ట్ 2 (2037) చిత్రాలు ఉంటాయి.
నెట్ఫ్లిక్స్ కురుక్షేత్ర
ప్రపంచ ప్రఖ్యాత ఓటీటీ సంస్థ నెట్ఫ్లిక్స్ కూడా వెనకబడలేదు. కురుక్షేత్ర పేరుతో భారతీయ ఇతిహాసం మహాభారతం ఆధారంగా యానిమేటెడ్ సిరీస్ను నిర్మిస్తోంది. ఇది నెట్ఫ్లిక్స్ ఇండియా ప్రథమ మిథాలజికల్ యానిమే ప్రాజెక్ట్ గా నిలుస్తుంది. 2025 అక్టోబర్ 10న స్ట్రీమింగ్ ప్రారంభం కానుంది.
హారర్ కామెడీ యూనివర్స్ లో యానిమేషన్
మైథాలజీ + యానిమేషన్ చిత్రాలతో పాటు, మరిన్ని జానర్స్ లో కూడా యానిమేషన్ సినిమాలు సిద్ధమవుతున్నాయి. బాలీవుడ్ లో మడాక్ ఫిల్మ్స్ హారర్ కామెడీ యూనివర్స్ లో భాగంగా ఛోటా స్త్రీ అనే యానిమేషన్ చిత్రాన్ని ప్రకటించింది. ఇది శ్రద్ధా కపూర్ ప్రధాన పాత్రలో వచ్చిన స్త్రీ కథకు ప్రీక్వెల్ లా ఉంటుందని నిర్మాతలు తెలిపారు.
అంతర్జాతీయ అనిమే ప్రభావం
భారతదేశంలో జపనీస్ అనిమే సినిమాలు కూడా విశేషంగా వసూళ్లు సాధిస్తున్నాయి. డెమన్ స్లేయర్ ఇన్ఫినిటీ కాజిల్ మూవీ ఇండియాలో భారీ వసూళ్లు సాధించగా, ముసఫా: ది లయన్ కింగ్ కూడా మంచి ఫలితాలు సాధించింది. వీటి ప్రభావంతో భారతీయ సినీ మేకర్స్ కూడా యానిమేషన్ పై మరింతగా దృష్టి సారిస్తున్నారు.
