రాజకీయాలు ఎప్పటికీ ఒకేలా ఉండవు. ఇవాళ చిన్నచూపు పడిన నేత రేపు పెద్ద స్థాయిలో ఎదగవచ్చు. నారా లోకేష్ ఉదాహరణగా చెప్పుకోవచ్చు. ఏడాదిన్నర క్రితం ఆయనను ఎగతాళి చేస్తూ, చిన్నచూపు చూస్తూ వచ్చిన వైయస్సార్ కాంగ్రెస్ నాయకులు, ఈరోజు ఆయన ఎదుగుదలను చూసి ఆశ్చర్యపోతున్నారు.
ఆ రోజుల్లో లోకేష్పై “మొద్దబ్బాయి”, “బొద్దబ్బాయి”, “పప్పు”, “తండ్రి చాటు బిడ్డ” అంటూ తీవ్ర విమర్శలు చేశారు. తెలుగు మాట్లాడలేడని, “మంగళగిరి” పలకలేడని కూడా ఎద్దేవా చేశారు. ఇంతేకాకుండా చంద్రబాబు ఎన్ని జాకీలు పెట్టినా లోకేష్ లేడు అని రోజా వంటి నేతలు వ్యంగ్యాస్త్రాలు ప్రయోగించారు. జగన్ చిటికెన వేలు కూడా టచ్ చేయలేదని ఆయనను హీనపరిచారు. అయితే, ఆ లోకేష్ ఈరోజు దేశ రాజకీయాల్లో కీలక చర్చనీయాంశంగా మారడం వైసీపీ వర్గాల్లో అసహనాన్ని కలిగిస్తోంది.
ప్రధాని దగ్గర చనువు
ఇప్పటివరకు ఢిల్లీకి ముఖ్యమంత్రి చంద్రబాబు వెళ్ళినా వైసీపీ వర్గాలు అసౌకర్యానికి గురయ్యేవి. మోదీతో పాటు కేంద్ర మంత్రులతో చంద్రబాబు తీసుకున్న ఫోటోలు చూసి తట్టుకోలేకపోయిన సందర్భాలు ఎన్నో ఉన్నాయి. ఇప్పుడు అదే స్థాయిలో, అంతకంటే ఎక్కువగా నారా లోకేష్ ప్రధాని మోదీతో తరచూ సమావేశమవుతున్నారు. ఆయన పక్కన కూర్చుని చర్చలు జరుపుతున్నారు. ఇది వైసీపీకి మరీ జీర్ణించుకోలేని విషయం.
మంచి పదవులు – కొత్త గుర్తింపు
ఒక ఆసక్తికరమైన విషయం ఏమిటంటే, వైసీపీ టార్గెట్ చేసిన నేతలంతా ఈరోజు మంచి పదవులు, ప్రాధాన్యం, గుర్తింపు సాధించారు. “పనికిరాని” అని పక్కన పెట్టిన నేతలంతా ఇప్పుడు వెలుగులో నిలిచారు. చంద్రబాబు, పవన్ కళ్యాణ్, లోకేష్, రఘురామకృష్ణంరాజు, అయ్యన్నపాత్రుడు – వీరంతా ఈ జాబితాలో ఉన్నవారే.
ఇక ముఖ్యంగా నారా లోకేష్ – ఒకప్పుడు ఎగతాళి చేసిన ఆయనను ఇప్పుడు వైసీపీ నేతలు కనువిప్పుతో చూస్తున్నారు. లోకేష్ ఎదుగుదల చూసి కొందరు అసహనంతో, మరికొందరు గౌరవంతో స్పందిస్తున్నారు.
లోకేష్కు మారిన ఇమేజ్
గతంలో ఎగతాళికి గురైన లోకేష్, ఈరోజు తన సహనం, పరిణితి, ప్రవర్తనతో మంచి పేరు సంపాదించుకున్నారు. ఆయన రాజకీయ పయనం వైసీపీ చేసిన విమర్శలకు బలమైన సమాధానంగా నిలుస్తోంది. ఇక వైసీపీకి పాత తరహాలో ఎగతాళి చేయడానికి ధైర్యం లేదు.
మొత్తానికి, నారా లోకేష్ ఎదుగుదల ఆయనకే కాదు, తెలుగు దేశం పార్టీకీ కొత్త బలం ఇస్తోంది. గతం ఆయనను ఎగతాళి చేసినా, వర్తమానం ఆయనకే గౌరవం దక్కేలా మారిపోయింది.
