అమరావతి: అల్పపీడన ప్రభావంతో ఆంధ్రప్రదేశ్ రాష్ట్రం అంతటా వర్షాల దెబ్బ మొదలుకానుంది. రాబోయే మూడు రోజులు పలు జిల్లాల్లో భారీ నుంచి అతి భారీ వర్షాలు కురిసే అవకాశముందని అమరావతి వాతావరణ కేంద్రం హెచ్చరించింది. సముద్రంలో అలజడి పెరగనున్నందున, తీర ప్రాంత మత్స్యకారులు వేటకు వెళ్లవద్దని అధికారులు ప్రత్యేక సూచనలు జారీ చేశారు.
బుధవారం వర్షాల ప్రభావం ఎక్కువ
బుధవారం (ఆగస్టు 13) నాడు పల్నాడు, గుంటూరు, కృష్ణా, ఎన్టీఆర్, నంద్యాల, ప్రకాశం, బాపట్ల, ఏలూరు, పశ్చిమ గోదావరి జిల్లాల్లో భారీ నుంచి అతి భారీ వర్షాలు పడే అవకాశం ఉందని తెలిపింది. అదేవిధంగా, డా. బీఆర్. అంబేడ్కర్ కోనసీమ, అల్లూరి సీతారామరాజు, అనకాపల్లి, పార్వతీపురం మన్యం, తూర్పు గోదావరి, కాకినాడ జిల్లాల్లో భారీ వర్షాలు కురిసే అవకాశం ఉంది.
గురువారం మరింత విస్తృత వర్షపాతం
గురువారం (ఆగస్టు 14) ప్రకాశం, పల్నాడు, బాపట్ల, గుంటూరు జిల్లాల్లో భారీ నుంచి అతి భారీ వర్షాలు కురిసే అవకాశం ఉండగా, అనంతపురం, కర్నూలు, నంద్యాల, వైఎస్సార్ కడప, శ్రీపొట్టిశ్రీరాములు నెల్లూరు, కృష్ణా, ఎన్టీఆర్, పశ్చిమ గోదావరి, తూర్పు గోదావరి, డా.బీఆర్. అంబేడ్కర్ కోనసీమ, అల్లూరి సీతారామరాజు జిల్లాల్లో భారీ వర్షాలు పడతాయని వాతావరణ శాఖ స్పష్టం చేసింది.
ప్రభుత్వం అత్యవసర చర్యలు
వాతావరణ హెచ్చరికల నేపథ్యంలో ఆంధ్రప్రదేశ్ ప్రభుత్వం ఇప్పటికే ప్రత్యేక కంట్రోల్ రూమ్ను ఏర్పాటు చేసింది. రాష్ట్రవ్యాప్తంగా పోలీసు మరియు ఇతర అత్యవసర సేవా సిబ్బంది సెలవులను రద్దు చేసింది. అన్ని జిల్లాల్లో డిజాస్టర్ మేనేజ్మెంట్ రెస్పాన్స్ టీమ్లను అప్రమత్తం చేశారు.
మున్సిపల్, ఆరోగ్య శాఖల సన్నాహాలు
మున్సిపల్ శాఖ సిబ్బందికి ప్రధానంగా రహదారులపై వర్షపు నీరు నిల్వ కాకుండా తక్షణ చర్యలు తీసుకోవాలని ఆదేశించారు. తీరప్రాంత పట్టణాల్లో నీటి కాలువలు, డ్రైనేజీ వ్యవస్థలను ముందుగానే శుభ్రం చేయమని ఆదేశాలు జారీ అయ్యాయి. మరోవైపు, భారీ వర్షాల కారణంగా వ్యాధులు ప్రబలే అవకాశాన్ని దృష్టిలో ఉంచుకుని ఆరోగ్య శాఖను కూడా ప్రభుత్వం అప్రమత్తం చేసింది.
తీరప్రాంత ప్రజలకు అప్రమత్తం
ప్రత్యేకంగా కోస్తా ఆంధ్రా ప్రాంత ప్రజలు వర్షాలు, గాలివానలు, సముద్ర అలజడి పరిస్థితులపై అప్రమత్తంగా ఉండాలని సూచించారు. చేపల వేటకు వెళ్లే మత్స్యకారులు వచ్చే 72 గంటలు సముద్రంలోకి వెళ్లరాదని స్పష్టం చేశారు.
