అమరావతి:
ఆంధ్రప్రదేశ్ సీఎం చంద్రబాబు నాయుడు వైసీపీ అధినేత జగన్మోహన్ రెడ్డిపై మద్యం కుంభకోణం అంశంపై సంచలన వ్యాఖ్యలు చేశారు. పార్టీ ఎంపీలతో జరిగిన సమావేశంలో ఆయన మాట్లాడుతూ, గత ప్రభుత్వం హయాంలో జరిగిన మద్యం కుంభకోణం కేసు దాదాపు ముగింపు దశకు చేరిందని తెలిపారు. ప్రత్యేక దర్యాప్తు బృందం (సిట్) నిరంతరంగా విచారణ చేపడుతుండగా, ఇప్పటికే అనేక అరెస్టులు చోటు చేసుకున్నాయని పేర్కొన్నారు.
“కోర్టులు కూడా బెయిల్ ఇస్తే వెనక్కి తగ్గిపోతున్నాయంటే, కేసు తీవ్రత ఎంత స్థాయిలో ఉందో అర్థం చేసుకోవచ్చు,” అని చంద్రబాబు స్పష్టం చేశారు. ఎంపీ మిథున్ రెడ్డికి బెయిల్ విషయంలో కోర్టుల స్పందన ఇదే విషయాన్ని సూచిస్తోందని వివరించారు.
చంద్రబాబు వ్యాఖ్యానిస్తూ, “అసలు దొంగలు ఇప్పుడు దొరుకుతున్నారు. గత పాలకుడు కూడా దొరికిపోయాడు. ఇది చిన్న విషయం కాదు. దీన్ని వదిలిపెట్టేది లేదు. ప్రజలకు వాస్తవాలు తెలియజెప్పేందుకు మన నాయకులు ప్రజల్లోకి వెళ్లాలి,” అని పార్టీ నేతలకు స్పష్టం చేశారు.
“ఇప్పటివరకు నేను ఈ విషయంలో మాట్లాడకపోవడానికి కారణం – సిట్ దర్యాప్తు కొనసాగుతుండడమే. ఏం చెప్పినా అది విచారణపై ప్రభావం చూపొచ్చన్నదే నా ఉద్దేశం,” అని చంద్రబాబు వివరించారు. అయితే, ఇప్పుడు అన్ని విషయాలు వెలుగులోకి వచ్చిన నేపథ్యంలో ఇక వెనుకడుగు వేయాల్సిన అవసరం లేదని చెప్పారు.
“జగన్ తన తప్పులను టీడీపీ నేతలపై మోపే ప్రయత్నం చేస్తున్నాడు. ప్రజలను తప్పుదోవ పట్టించే ప్రయత్నం చేస్తూ విష ప్రచారానికి పాల్పడుతున్నాడు. పార్టీ నాయకులు అప్రమత్తంగా ఉండాలి. ఆయన ప్రాపగండాను ప్రతిస్పందించాలి,” అని స్పష్టమైన సూచనలు ఇచ్చారు.
“అవసరమైతే పార్లమెంటులో కూడా ఈ అంశాన్ని లేవనెత్తండి. ప్రజల ముందు వాస్తవాలు ఉంచండి. ఎవరూ వెనక్కి తగ్గవద్దు,” అని చంద్రబాబు ఎంపీలకు స్పష్టం చేశారు.
