సోషల్ మీడియా ప్రయోజనాలు ఎంతైతే ఉన్నాయో, అదే స్థాయిలో సమస్యలకు దారి తీసే అవకాశాలు కూడా ఎక్కువగా ఉన్నాయి. తాజాగా టాలీవుడ్ హీరోయిన్ కాజల్ అగర్వాల్‌ కూడా ఇలాంటి ఒక వివాదంలో చిక్కుకున్నారు.
ఇటీవ‌ల కాజల్ కుటుంబంతో కలిసి మాల్దీవుల‌కు విహించేందుకు వెళ్లారు. భర్త గౌతమ్ కిచ్లు, కుమారుడు నీలుతో కలిసి సముద్రతీరంలో విహారయాత్ర చేయగా, అక్కడి అనుభవాల్ని అభిమానులతో పంచుకోవాలని భావించి కొన్ని ఫొటోలు తన సోషల్ మీడియా ఖాతాలో పోస్ట్ చేశారు. ఈ బీచ్ ఫొటోలు లక్షల కొద్ది లైకులు రాబట్టాయి. కానీ ఆశించని విధంగా ఈ ఫొటోలే ప్రస్తుతం వివాదానికి దారి తీశాయి.
ఇందుకు కారణం — ఆమె నటించిన ‘కన్నప్ప’ సినిమా. కొన్ని గంటల్లో విడుదల కాబోతున్న ఈ సినిమాలో కాజల్ పార్వతీ దేవిగా నటించారు. ఒక వైపు ఆధ్యాత్మిక పాత్రను పోషించిన ఆమె, మరోవైపు బీచ్ డ్రెస్సులో ఉన్న ఫొటోలు సోషల్ మీడియాలో వైరల్ కావడం కొందరిని ఆగ్రహానికి గురిచేసింది.
తన పాత్రకు తగిన విధంగా ప్రవర్తించాలి అనే అభిప్రాయంతో కొంతమంది నెటిజన్లు కాజల్ పై విమర్శలు గుప్పిస్తున్నారు. ‘‘పార్వతీ దేవిగా నటించేందుకు ముందు ఇలాంటి ఫొటోలు పోస్ట్ చేయడం తగదు’’ అని అభ్యంతరం వ్యక్తం చేస్తున్నారు. అయితే ఆమె డ్రెస్సింగ్‌లో స్పష్టంగా అనుచితత ఏమీ కనిపించకపోయినా, ఈ తరహా విమర్శలు ఎదురవడం సోషల్ మీడియా స్వభావాన్ని మరోసారి హైలైట్ చేస్తోంది.
ఒక్క మాటలో చెప్పాలంటే, నటీనటులు ఏ పాత్రలో నటించినా, వారి వ్యక్తిగత జీవితానికి సంబంధించి ఎలాంటి ప్రవర్తనైనా సమాజం నిశితంగా గమనిస్తోందనే వాస్తవాన్ని ఈ ఘటన మరోసారి రుజువు చేసింది.
