ఎండాకాలం సమీపిస్తోంది. మార్చి నెలకు ఇంకో వారం రోజులే మిగిలి ఉన్నాయి. ఉదయాన్నే కొంచెం చల్లగా అనిపించినా, మధ్యాహ్నం వేళ సూర్యుడు తన వేడి చూపించడం మొదలుపెట్టాడు.
ఇంకా వేసవి పూర్తిగా మొదలుకాకముందే రోడ్ల పక్కన చెరకు రసం బండ్ల దగ్గర రద్దీ పెరుగుతోంది. ఎండ వేడికి గొంతు ఎండిపోతుంటే, కళ్లముందు చల్లని చెరకు రసం కనిపిస్తే వెంటనే ఆగి తాగేయాలనిపిస్తుంది. కానీ ఈ సమయంలో చెరకు రసం తాగడం నిజంగా ఆరోగ్యానికి మంచిదేనా?
రుచి కోసం తాగి అనారోగ్యాన్ని ఆహ్వానిస్తున్నామా? మారుతున్న వాతావరణంలో ఆహారపు అలవాట్ల విషయంలో కాస్త నిర్లక్ష్యం చేసినా, అది ఆరోగ్యంపై ప్రతికూల ప్రభావం చూపుతుంది. ముఖ్యంగా ఈ సీజన్లో చెరకు రసం తాగే ముందు కొన్ని ముఖ్యమైన విషయాలు తెలుసుకోవాలని నిపుణులు సూచిస్తున్నారు. అవేంటో చూద్దాం.
ఇప్పుడే తాగడం మంచిదేనా?
చెరకు రసాన్ని సహజ కూల్ డ్రింక్గా భావిస్తారు. మే–జూన్ నెలల్లో మండే ఎండలో వడదెబ్బ తగలకుండా ఇది ఉపశమనంగా పనిచేస్తుంది. కానీ ప్రస్తుతం ఉన్నది ఫిబ్రవరి–మార్చి మధ్య కాలం. చలికాలం ముగిసి వేసవి మొదలయ్యే ఈ మార్పు కాలంలో వాతావరణం చాలా వేగంగా మారుతుంది.
ఆయుర్వేద నిపుణుల అభిప్రాయం ప్రకారం, ఇలాంటి సమయంలో అత్యంత చల్లటి పానీయాలు తీసుకుంటే శరీరం త్వరగా అస్వస్థతకు లోనయ్యే అవకాశం ఉంది. ఈ సీజన్లో చేసే చిన్న తప్పు కూడా జలుబు, దగ్గు, గొంతు నొప్పి లేదా జ్వరానికి దారి తీస్తుంది.
ఈ జాగ్రత్తలు తప్పక పాటించండి
చెరకు రసం ఇష్టమైతే లేదా దాహం తీర్చుకోవడానికి తాగాలనుకుంటే, కింది సూచనలు పాటిస్తే అనారోగ్య ప్రమాదం తగ్గుతుంది.
ఐస్ వద్దు… ఆరోగ్యం ముద్దు
ఈ సీజన్లో చెరకు రసంలో ఐస్ వేయించుకోవడం పెద్ద తప్పు. బండి వద్దకు వెళ్లగానే “ఐస్ వద్దు” అని స్పష్టంగా చెప్పండి. ఇప్పుడున్న వాతావరణంలో ఐస్ కలిపిన రసం తాగితే వెంటనే గొంతు నొప్పి వచ్చే అవకాశం ఉంది.
అల్లం–నిమ్మరసం మ్యాజిక్
చెరకు రసంలో కొద్దిగా అల్లం రసం, నిమ్మరసం లేదా పుదీనా కలిపించుకుని తాగండి. ఇవి చెరకు రసం చల్లదనాన్ని సమతుల్యం చేయడమే కాకుండా జీర్ణశక్తిని మెరుగుపరచి, గొంతు ఇన్ఫెక్షన్ల నుంచి కొంతవరకు రక్షణ ఇస్తాయి.
సమయం చూసి తాగండి
ఉదయం పూట లేదా సాయంత్రం చల్లబడిన తర్వాత చెరకు రసం తాగకపోవడం మంచిది. మధ్యాహ్నం ఎండ ఎక్కువగా ఉన్న సమయంలో మాత్రమే పరిమితంగా తీసుకోండి.
అతిగా వద్దు
ప్రస్తుతం రోజూ చెరకు రసం తాగడం అలవాటుగా మార్చుకోవడం మంచిది కాదు. ఎప్పుడైనా రుచి కోసం తాగేటప్పుడు కూడా 100–200 మి.లీ. మించకుండా పరిమితం చేయండి.
Disclaimer:
ఈ ఆర్టికల్లోని సమాచారం సాధారణ అవగాహన, విద్యా ప్రయోజనాల కోసం మాత్రమే. ఇది వైద్యుల సలహా, రోగ నిర్ధారణ లేదా చికిత్సకు ప్రత్యామ్నాయం కాదు. మీ ఆరోగ్య పరిస్థితికి సంబంధించి సందేహాలు ఉంటే వైద్య నిపుణుల సలహా తప్పనిసరిగా తీసుకోండి.
